ONGOONGO TUKU ATU (24 ‘Epeleli, 2020)

‘Oku loto ‘a e Potungaue Mo’ui ke fakaha koe’uhi ‘oku hokohoko atu pe ‘enau ngaue ke ta’ota’ofi ha faingamalie ke hu mai pea mafola ‘a e COVID-19, na’e tu’utu’uni ai ‘a e Potungaue Mo’ui ‘aneafi ke kolonitini ‘a e tokotaha e kau pasese na’e teu folau atu ki Nu’usila neongo ‘oku si’isi’i ‘aupito pe e faingamalie ia ke ma’u ai e tokotaha ko eni ‘e he COVID-19.

’Oku ‘ikai pe kemau to’o ma’ama’a ha me’a he ko e mo’ui eni ‘a e kakai pea ‘oku mau tokanga ma’u pe ki he kau’afonua. ‘I he’ene pehe ‘oku lolotonga kolonitini ai e tokotaha ‘i ke Kemi Taliai ‘i ha ‘aho ‘e 14,‘ ko e fakamatala ia ‘a e Talekita Mo’ui Toketa Siale ‘Akau’ola.

Na’e ma’u mai e lipooti ‘o pehe fakafuofua ki he 2:20efiafi ‘aneafi, na’e ma’u e fetu’utaki mei he Va’a Fefolau’aki ‘a Nu’usila ki he Pule ‘o e ‘Ea Nu’usila ‘i Tonga ni ‘o fakaha ai ke fakahifo e pasese ‘e taha ‘oku ‘ikai ke ne ma’u e ngofua ke tu’uta ‘i Nu’usila hili hono to e fusia’u ‘a e ngaahi tu’utu’uni fefolau’aki pea ka ‘ikai ke muimui e kautaha vakapuna ki he fekau ko eni ‘e ala tautea’i pe faka’ilo.

Na’e fakahoko leva e ngaue ‘a e Timi Malu’i ‘a e Kau’afonua ‘a e Potungaue Mo’ui ki hono kolonitini ‘o e tokotaha ko eni ‘i ha founga ‘oku malu mo pau. Na’e maau foki mo e teunga malu’i ma’ae pasese pea ‘omai ai pe ki he fale kolonitini ‘i he Kemi Taliai.

’Oku fu’u si’isi’I e faingamalie ia ke ma’u ‘e he tokotaha ko eni e COVID-19 koe’uhi na’e te’eki ke ofi ia ki ha taha ‘oku fakapapau’i pe mahamahalo’i ‘oku puke ‘i he COVID-19 pea ‘oku kei hao ‘a Tonga ia. ‘Ikai ngata ai ka na’e ‘ikai ha pasese ne hifo mai pea ko e kau ngaue he vakapuna ko eni na’e ‘osi ‘omai ‘enau tohi sivi mo’ui lelei kimu’a ‘enau folau mai ke fakamo’oni’i ‘oku nau hao mei he COVID-19. Ko e faka’ehi’ehi makehe pe eni pea fakapotopoto ange pe hono kolonitini he ko ‘ene to e hifo mai. Kuo maau e kau toketa mo e neesi mo e kau ngaue ‘a e Potungaue Mo’ui ke siofi e tokotaha ni ke fakapapau’i e tu’unga mo’ui lelei ‘oku ‘i ai pea ko e tu’utu’uni ngaue eni ia ke ta’ota’ofi ha faingamalie ke hu mai ai e COVID-19,’’ ko e tanaki ia ‘a Toketa Siale ‘Akau’ola.

‘Oku kei hao pe foki pe ‘a Tonga ni mei he COVID-19 pea ‘oku kei hokohoko atu pe ‘a e ngaue ia ‘a e Potungaue Mo’ui ke mateuteu ange ‘a Tonga ni pea mo ha ngaahi founga ngaue ‘oku fakasi’isi’i ange ai ha faingamalie ke hu mai mo mafola e COVID-19 ‘i Tonga ni.

Na’e folau atu ‘a e vakapuna ‘Ea Nu’usila ‘aneafi ‘i he 3:10 efiafi mo e kau pasese ‘e took 132.

‘Oku lelei foki ki he kau pasese ‘oku nau teu folau atu ki tu’apule’anga kenau to e fakapapau’i e tu’unga ‘oku ‘i ai ‘enau ngofua folau. Ko e fale’i ‘oku tuku mai ‘e he Va’a Fefolau’aki ‘a Nu’usila ‘oku fakaha ai ‘oku tali ke foki ange ‘a e kau tangata’i mo e fefine’i fonua Nu’usila, kau nofo fonua, kau nofo fonua ‘oku ‘i ai e ngaahi makatu’unga fefolau’aki pau ma’a kinautolu mo honau famili (hoa pe mali, tauhi fanau fakalao mo e fanau ta’u si’i hifo ‘i he ta’u 24). ‘Oku ngofua ke foki ange pea mo e kau tangata’i mo e fefine’i fonua ‘Aositelelia mo e kau nofo fonua ‘oku angamaheni ‘enau nofo ‘i Nu’usila.

‘Oku ‘oatu ai pe ‘a e fakamalo ‘a e Potungaue Mo’ui ki he kakai ‘o e fonua ki he ngaahi fepoupouaki kotoa pe.

Ki he fakaikiiki: https://bit.ly/2VGbwo8

Like, Share or Print!: